Vang

Vang er den øvste kommunen i Valdres, midt i Sør-Norge og rett inn for Sognefjorden. Området har lange tradisjonar som møteplass og ferdselsåre mellom aust og vest, og stamvegen E-16 mellom Oslo og Bergen går gjennom heile kommunen.

I nord finn vi Jotunheimen med innsjøane Tyin og Bygdin. Ein stor del av totalarealet på vel 1500 km2 ligg over 1000 m o h, men busetnaden er konsentrert ved dalbotnen langs Begnavassdraget med Vangsmjøsa.
 
I følgje Snorre Sturlason hadde Harald Hårfagre si rikssamling utgangspunkt i Vang - med Gyda som vaks opp på Kvie. I følgje Snorre bar Olav den heilage si ferd gjennom bygda i 1023 meir preg av herjing og strid en kristning av bygda. Det er likevel seks kyrkjer i Vang, og to av desse er stavkyrkjer. St.Tomaskyrkja på Filefjell vart riven i 1808 men er seinare bygd opp att, og Vang stavkyrkje vart selt i 1843 og står no i Polen. Vang sitt kommunevåpen med tre sverd og liljebord skriv seg frå riddaren Sigvat på Leirhol. På 1200-talet rådde han over øvre Valdres med Hallingdal og var medlem av Riksrådet. Han har også gjeve namn til Riddarspranget, der han hoppa over Sjoa med ei jente han fekk med seg frå Gudbrandsdalen.
 
Med knapt 1600 innbyggjarar har kommunen klart å halde oppe gode tenesttilbod, med vel utbygde barnehagar, grunnskular, helse- og omsorgstenester og kulturtilbod. Vinjerock på Eidsbugarden ved Bygdin samlar unge og eldre frå heile landet kvart år. Store fjellområde gjev gode tilhøve for friluftsliv heile året. Hovudnæringa har tradisjonelt vore jordbruk med mjølkeproduksjon og sauehald. Store delar av dei mange stølsområda rundt om i kommunen er framleis i aktiv drift. Turisme og reiseliv, som har lange tradisjonar i Vang, er også viktige næringar.