Vestre Slidre

Vestre Slidre kommune er ein av dei 6 Valdreskommunane i Oppland fylke. Slidrefjorden og Strandefjorden, som er ein del av Begnavassdraget, deler kommunen i to.

På austsida stig terrenget opp mot dei høgste barskogkledde områda i Norge. I vest går dalsidene over i slakke og vide fjellvidder med store samanhengande stølsområde der ein enno finn aktiv stølsdrift. Lengst mot vest nær grensa til Hemsedal finn ein fjelltoppar på over 1600 meter.

Kommunen har om lag 2 200 innbyggjarar fordelt på 464 km2 . Dei aller fleste er busett langs vassdraget og E16 som går gjennom kommunen. Kommunen har tre tettstadar; kommunesentret Slidre, handelssentret Røn/Fosheim og bygdesentret Lomen. Kommunen har også eit satsingsområde for reiseliv på Vaset.

Landbruket er den største næringa i kommunen, med sine 197 aktive bruk. Østlandsmeieriet er den største bedrifta med 94 tilsette. Drfitsforma i jordbruket er vesentleg kjøtt og mjølkeproduksjon. Du finn stølar i full drift i våre vakre fjellområde. Kvart år er det stølsfestival på Vaset.

Reiseliv er ei tradisjonsrik og viktig næring i Vestre Slidre. På Vaset er eit 360 dekar stort område tilrettelagt med vatn og kloakk for etablering av fjellstover, serveringssatder, hotell m.m. Her finn du skiheis, turløyper for både sommer- og vinterbruk. 
Fiskeoppdrettarar frå Vestre Slidre bidreg stort til å oppretthalde Valdres sin status som ”rakfiskriket”.